Gituohan nga lango sa ilimnong makahubog ug nakatagpilaw ang usa ka drayber sa multicab nga nibangga sa magti-ayon nga nagtindog sa daplin sa karsada ug milahos kini sa tindahan nga bahin.
Kini ang gibutyag sa kapulisan subay sa pagsaysay usab sa nakalingkawas nga biktima.
Kahinumduman nga patay sa disgrasya ang usa ka babae human nga nabanggaan sa usa ka multicab kaganihang kaadlawon.
Subay sa report sa kapulisan, nahitabo ang insidente sa bangga sa Purok 3, Brgy. Balutakay Hagonoy Davao Del Sur pasado alas Tres sa kaadlawon.
Giila ang biktima nga si Jocelyn Jagolina Lumictin, 33 anyos, residente sa nasampit nga lugar.
Sa inisyal nga imbistigasyon sa kapulisan, igo lamang nga nagtindog ang biktima uban ang iyahang bana apan kalit kining gibanggaan sa naghaguros nga multicab ngadto sa ilahang gitindugan.
Gidala pa ang biktima sa ospital apan gideklara kini nga dead on arrival.
Nasayran nga ang sakyanan padulong kini sa Digos City. Gumikan sa kakusog sa pagkabangga niahos pa kini sa usa ka tindahan nga anaa sa kilid sa karsada.
Maayu na lamang nga nakadagan pa ang bana sa pikas nga bahin sa karsada ug wala naalaot sa maong panghitabo.
Sa karon gikustudiya na sa kapulisan ang drayber ug pasakahan kini ug kaso nga reckless imprudence resulting to homicide and damage to property.
