DAVAO CITY – Gipasakahan na ug kasong kriminal sa Office of the City Prosecutor ang usa ka lalaki nga gikanayong nagmaneho sa iyang motor nga lango sa ilimnong makahubog.
Mismong si Prosecutor Faizal Padate ang mirekomenda nga pasakahan si Rodrigo Cuenca Sotillo ug kalapasan sa Republic Act 10586 (Act Penalizing Persons Driving under the Influence of Alcohol, Dangerous drugs and similar Substances).
Gawas niini nag-atubang sab ang nahisgutan ug kalapasan sa Sec. 7 sa Republic Act 10054 gumikan kay nagmaneho sab kini ug motor nga wala nakasuot ug helmet.
Gipasakahan ang nahisgutan human ang giduso nga reklamo nila ni SPO1 Wennie Tuazon ug PO1 Jeffery Quiamzon.
Nagpahigayon ug pag-patrolya ang mga police officers dihang ilang gisikop si Sotillo gumikan kay wala kini helmet, sobra ang sakay sa motorsiklo ug wala nakapasar sa gipailalom mga breath analyzer gumikan sa sobra kahubog. Pakyas sab sumala pa ang nahisgutan nga makasumite sa iyang driver’s license.
Gikanayong ang mga nahimong kalapasan si Sotillo usa sab ka pagsupak sa Republic Act 4136 (Land Transportation and Traffic Code).
