DAVAO CITY – Padayon ang pagpangita sa kapolisan sa mga suspek nga mitabang ug kulata hangtud nga namatay ang usa ka driver.
Kahinumduman nga patay diha-diha dayon ang usa ka driver human kulataha sa wala maila nga mga responsabli.
Naila ang biktima nga usa ka Zacaria Dimaapao, 47 anyos, driver ug residente sa Dua San Rafael, Barangay 9-A, ning dakbayan sa Davao.
Nasayran nga ang nahisgutan nga biktima gikan nga nag-inum-inum sa Bankerohan.
Sa dihang pauli na giatangan ug gitabangan ug kulata ang nahisgutan nga biktima sa wala pa maila nga mga responsabli, dapit sa Pichon St., Bankerohan.
Nakahi-agum ug labihan ka daghan nga mga bun-og sa nagkada-iya nga bahin sa iyang kalawasan ug sa ulo ang biktima nga nahimong hinongdan sa iyang hinanali nga kamatayon.
Gipanlimpasugan pa sa mga paramedic sa Central 911 ang pagluwas sa kinabuhi ang biktima, apan napakyas.
