Tingkagol sa selda sa kapulisan ang usa ka 40-anyos nga drayber sa PUJ human nga nadakpan tungod sa pagpangawat og motorsiklo.
Subay sa report sa kapulisan, giila ang dinakpan nga si alias Mulot 40-anyos, usa ka drayber nga residente sa Buhangin ning dakbayan sa Davao.
Sumala sa report sa mga otoridad, naaktuhan ang suspetsado sa gihimong hot pursuit operation nga nagabaligya og mga motor nga kinawat sa online.
Gisaysay usab sa kapulisan nga adunay usa ka complainant nga taga Bangkal ang mi-report sa Talomo PNP nga gikawat ang motor niini sa parking area sa Bangkal.
Gilayon sumala pa nga nagpakatag og hulagway ang complainant kagahapon pasado alas Onsi sa buntag.
Pagkahuman sumala pa sa gihimong pagpakatag sa mga hulagway sa raider nga motor ang kapulisan sa Buhangin, adunay nakuha nga impormasyon nga ang nasampit nga motorsiklo ang gibaligya sa online.
Gilayon nga nagpahigayon og joint operation ang mga kapulisan aron madakpan ang suspetsado.
Sumala pa sa kapulisan nga ilahang natumbok ang gipuy-an sa suspek sa usa ka subdivision sa Cabantian ug nakumpiska ang motor nga kinawat.
Samtang atol sa gihimong pag-imbistiga sa mga otoridad, nasayran niini nga aduna pa kini laing tulo ka mga motor nga iyahang gipangkawat nga anaa sa Tibungco ning syudad nga giadto-an gilayon sa mga kapulisan uban ang suspetsado.
Sa pagkakaron, nakiglambigit na ang kapulisan sa Bunawan aron nga masayran kung kinsa ang nanag-iya sa mga motorsiklo.
Sa pagkakaron, gipasakahan na og kasong carnapping kon pagsupak sa RA 10883 ang PUJ driver samtang ginasuta pa usab karon sa mga otoridad ang mga tag-iya niini.
