Patay ang motor rider nga si alyas Ferdie, 36, taga-Catalunan Grande, human nabanggaan sa usa ka tractor head trailer truck sa Km. 14, Daang Maharlika Highway, Panacan, Davao City, pasado alas 9:30 kagabii, Hulyo 28, 2025.
Samtang naangol usab ang iyang angkas nga si alyas Anne, 24, nga iyang kapuyo, apan nakaluwas sa insidente nga nahitabo duol sa kanto sa Malagamot Road.
Subay sa imbistigasyon sa kapulisan nga susamang nagdagan sa samang direksyon ang motor ug ang trak.
Nasayran nga ang motor anaa sa outer lane, samtang ang trak naa sa inner lane.
Pag-abot sa duol nga traffic light, milapas sa linya ang trak ug naigo ang motor nga maoy nanghinungdan sa disgrasya.
Gidali og respondehan ang duha sa BDRRMC Panacan ug gidala sa Southern Philippines Medical Center (SPMC).
Apan, tungod sa grabeng samad, gideklarang patay si Ferdie. Si Anne, miangkon lamang og minor injuries.
Gikustodiya na sa kapulisan ang drayber sa trak nga si Ben, 43 anyos, alang sa pagpasaka og tukmang kaso.
