Patay ang usa drayber nga igo lamang nagkaon og barbecue sa Barangay Leon Garcia, Agdao, Davao City, pasado alas 5:30 sa hapon niadtong milabay nga adlaw.
Subay sa rekord, giila ang biktima nga si Michael Lozada, 30-anyos nga residente sa Barangay Tomas Monteverde, samtang ang suspek giilang si Genisis Macatunaw, tindero og buko juice, residente sa Malita, Davao Occidental.
Sa nahimong imbestigasyon sa kapulisan, gisaysay matud pa sa mga nakasaksi nga igo lamang matud pa nagkaon og barbecue ang biktima, apan kalit matud pa kini nga gidunggab sa suspek, dayon sibat sa wala matinong direksiyon.
Nadala pa sa balay tambalanan ang bitkima, apan pipila ka oras ang milabay, gideklara kining patay.
Sa karon, nagpabiling gawasnon ang suspetsado ug padayon pa nga ginapangita, samtang nagpadayon sab ang imbestigasyon sa kapulisan aron masuta og unsay motibo sa maong krimen.
