DAVAO CITY – Naglaom si Southern Philippines Medical Center (SPMC) officer-in-charge Ricardo Audan nga dili magbag-o ang huna-huna sa pipila ka mga health workers nga kalakip sa mga nagpalista ug una nga mabakuhan gamit ang sinovac vaccine sa China.
Kahinumduman nga mikabat sa 4,000 gikan sa 5,900 ka mga hospital workers ang nagpalista ug mipakita ug kaandam nga matuplokan ug covid 19 vaccine apan sukwahi kini sa nauna nga plano nga ituplok kanila nga maggikan sa Pfizer sa United States o AstraZeneca sa United Kingdom.
Hinuon dako ang pagsalig ni Audan nga walay magbag-o sa naunang desisyon sa mga health workers human nga Sinovac ang unang batch nga miabot sa nasod.
Una ng gibutyag ni Dr. Audan nga siya mismo ang unang magpatuplok ug Sinovac vaccine kini aron masiguro nga mosaka sab ang kompiyansa sa mga SPMC workers.
Kahinumduman nga mikabat sa 12,000 ka mga sinovac vaccine ang gitagana dinhi sa dakbayan sa Davao ug gikatakda ng sugdan ang pagbakuna sa Marso 5, 2021.
