Gikompirma ni Public Works Secretary Manuel Bonoan nga nagpagawas na ang Department of Public Works and Highways (DPWH) og show cause order batok sa mga indibidwal nga nalambigit sa usa ka peke nga flood control project sa Baliwag City, Bulacan.
Nasuta ang kontrobersiya human mismo si Presidente Ferdinand Marcos Jr. nakadiskubre nga wala diay tinuod nga proyekto nga natukod, hinungdan nga naglusad dayon ang DPWH og internal probe.
Gipahibalo ni Bonoan nga kung dili makahatag og klarong tubag ang mga giimbestigahan, suspensiyon ug kasong kriminal ang posibleng ipasaka.
Gibutang usab sa “floating status” si kanhing district engineer Henry Alcantara ug iyang kapuli nga si Brice Hernandez samtang nagpadayon ang imbestigasyon.
Gisuportahan kini sa inisyatibo nga “Sumbong sa Pangulo” website, nga gipasidungog ni Marcos aron masuta ang implementasyon sa mga flood control projects.
Nasuta nga daghang proyekto ang wala gyud napatuman bisan pa sa dagkong pondo nga gigahin.
Gipadayag sa Malacañang nga plano nilang palapdan ang website aron dili lamang flood control apan apil na sab ang ubang infrastructure projects.
Matud pa sab ni Sen. Panfilo Lacson, nga dako kini’g natabang sa pag-track sa proyekto ug sa pagkwestyon kung asa napadulong ang bilyones nga pondo.
