DAVAO CITY – Bisan nga wala mihatag ug direktang pahayag kalabot sa mga nahimong akusasyon ni Vice Presidential Candidate Walden Bello kalabot sa kurapsiyon sa coastal road project sa siyudad, gikanayon ni Department of Public Works and Highways (DPWH) Sec. Roger Mercado nga lahi ang nahisgutan nga proyekto sanglit adunay kini daku nga components kung itandi sa mga ordinaryo highways.
Gitino ni Mercado nga ang nahisgutan nga coastal road ang usa mga flagship projects sa kasamtangang administrasyon arun nga masulbad ang nasinatian nga trapiko sa Cotabato-Davao Road sugod sa Toril area paingon na sa downtown area.
Magsilbi sab sumala pa kini nga bypass road, coastal shore protection, ug breakwater nga mo-protekta sa siyudad sa mga balud sa kadagatan, water surges, ug shore erosion.
Kahinumduman nga sakop sa nahisgutan nga proyekto ang lapad nga dalan, bicycle lanes; uban ang curb, gutter ug sidewalk.
Gitukod sab sumala pa ang dalan daplin sa baybayon sanglit lisud ang pagkuha sa “road right of way” ilabi na nga daghan ug informal settlers sa palibut diin gitukod ang proyekto, adunay pipila ka mga resorts sa Talomo coastlines, ug adunay mga institutional structures nga maapektohan.
Kahinumduman nga ang Bago paingon Barangay Talomo stretch sa coastal road ang una ng gi-ablihan sa publiko kaniadtong Enero 29 apan limitado lamang kini sa biking, walking ug uban pang fitness activities.
Samtang una na sab nga gipanghimaka sa Department of Transportation (DOTr) ang pahayag ni Bello nga adunay kurapsiyon sab sa public utility vehicles (PUV) modernization program (PUVMP) sa lokal nga kagamhanan.
