Gikatakdang ipatawag pag-usab sa Davao City Council ang DPWH tungod sa pag-abri sa Bucana Bridge bisan wala pa kini hingpit nga nahuman.
Sumala ni First District Councilor Tek Ocampo, kaniadto na kini napatawag sa daghang higayon tungod sa pagkalangan sa ubang proyekto sa dakbayan sa Davao.
Matod pa niya, wala’y lohika nga abrihan ang usa ka tulay nga wala pa nahuman samtang adunay mga proyekto nga na‑delay tungod sa kakulang sa pondo.
Kahinumduman nga una nang gikwestyon ni Davao City Acting Mayor Sebastian “Baste” Duterte ang desisyon nga abrihan ang Bucana Bridge exit bisan wala pa kini mahuman ug wala pa ang pormal nga na-turn over sa lokal nga pangagamhanan.
Matod ni Mayor Baste, delikado ang maong lakang tungod kay duha pa lamang ka lane ang andam, ug wala pa’y streetlights, safety barriers, ug klarong traffic signages sa maong bahin sa dalan, nga posibleng mahimong hinungdan sa mga aksidente.
Gipunto usab ni Duterte nga ang Bucana Bridge anaa pa sa jurisdiction sa Department of Public Works and Highways (DPWH), busa dili pa kini angay gamiton sa publiko.
Gikondena usab niya ang iyang gitawag nga “carelessly set deadline,” matod pa nga mas angay unahon ang kaluwasan sa publiko kaysa politikal nga timetable, ilabi na nga dakong proyekto ang Bucana Bridge nga gilauman makatabang sa pagluag sa trapiko sa siyudad.
Tungod niini, gi-postpone sa DPWH-11 ang gikatakda unta nga pag-abri sa bag-ong tulay.
