DAVAO CITY – Papaspasan na sa Department of Public Works and Highways XI ang flood control project sa La Verna Hills Subdivision sa Buhangin District ning Dakbayan.
Kini human nga niabot na sa mga atop sa mga panimalay ang tubig-baha nga dala sa kusog nga pagbunok sa ulan niadtong Lunes sa gabii.
Gikanayon ni DPWH XI spokesperson Dean Ortiz nga ang lima ka mga proyekto nga giimplementar sa Diversion Road-La Verna segment ug sulod mismo sa maong subdivision ang anaa na sa 45 percent ang completion rate.
Anaa usab sa kinatibuk-ang 319 million pesos ang budget alang sa nasangpit nga proyekto.
Tumong sa proyekto nga mupaspas ang paghubas sa tubig-baha sa Diversion Road sanglit ang baha nga gikan dinhi ang mu-overflow ngadto sa La Verna.
Magmugna usab og pumping house ang buhatan atbang mismo sa entrada sa subdivision ug usa ka cross drain padulong sa La Verna creek. Anaa na usab sa 70 percent ang completion rate sa pag-install og HDPE pipes ug box culverts sa maong dapit.
Dugang ni Ortiz, kinahanglan usab palapdan ang La Verna Creek gumikan kay heavily-silted na kini ug dili na haum ang kadak-on sa mga drainage pipe sa maong dapit.
Gibutyag usab sa opisyal nga ang road right-of-way issues ug ang pagmagahi sa mga pipila ka mga residente ang mga nag-unang hinungdan sa pagkadelatar sa mga nahisgutang proyekto.
