DAVAO CITY- Giangkon sa Regional Director sa Police Regional Office (PRO) XI ang mandato sa pagmuntar og wanted posters nila Pastor Apollo Quiboloy ug uban pa niining kaubanan sa nagkadaiyang dapit ning dakbayan.
Kini human namatikdan sa pipila ka mga residente ang gipangbutang nga wanted posters gawas sa mga police stations ug uban pang lugar ning syudad karong panahona.
Alayon niini gikabutyag ni PBGen. Nicholas Torre III nga siya ang nagmando sa pagpakatag sa dosyintos ka mga kopya sa wanted posters nila Pastor Quiboloy isip tabang sa nagpadayong imbestigasyon ug pagpangita sa mga otoridad.
Pagpaklaro pa sa opisyal nga dili na bag-o ang iyang lakang sanglit daan ng gianunsyo sa DILG ang P10M nga reward money sa makakita sa pastor ug P1M sab sa makahatag og impormasyon sa mga kaubanan niini rason nga nahisubay lamang kini sa balaod.
Dugang pa sa opisyal nga makatabang ang pagpakatag sa mga posters dili lamang dinhi sa Davao kondi kalakip na sa tibuok pilipinas sanglit adunay kapasidad ang Pastor ug upat pa niining kaubanan nga makagawas sa nasud.
Kahinumduman nga daan ng gibutyag ni Torre nga dili niini focus ang pagdakop kay Quiboloy gumikan mas labing ginatutokan niini karon ang pagpalambo sa 3-minute response nga labing makatabang sa mga nanginahanglan.
