DAVAO CITY – Nagkarambola ang dose ka mga sakyanan nga gilangkuban sa unom ka mga truck ug lima ka sakyanan sa Diversion Road, Maa, Davao City, kagahapon bandang alas-11:30 sa udto.
Sumala sa report sa Maa Police, nawad-an og brake ang trailer truck nga nagresulta sa matud pa sunod-sunod nga pagkadaro sa mga sakyanan sa unahan nga gilangkuban sa 2 ka container van, 3 ka trailer truck, 1 ka forward truck, 1 ka Sedan, 4 ka SUV og 1 ka Toyota Vios.
Sa nahitabong disgrasya, unom ang natalang angol diin nahilakip ang 2 ka driver sa trailer truck, 1 ka pahinante sa truck, ang asawa sa driver, usa ka bata og laing usa ka lalaking nakuyapan ang padayong gitambalan sa balay tambalanan sa SPMC.
Wala una nila ginganlan sa kapulisan ang unom ka mga nangaangol. Hinuon, walay natalang patay sa makuyaw nga aksidente.
Tubagon sab sa tag-iya sa container van ang danyos sa mga nagbanggang sakyanan.
