Opisyal na nga gitunol sa Department of Social Welfare and Development – Davao Region kon DSWD-Davao ang bag-ong dormitoryo alang sa Ata Manobo nga mga magtutungha.
Nahimutang sa Tapak National High School, ang nagkantidad sa P372,000 nga pasilidad nga nagtinguha nga mohatag sa mga tinun-an og nindot nga palibot aron nga makatutok sa ilang pagtuon, makubsan ang pagbakwit, ug malikayan ang sayong pagpanarbaho ug pagminyo.
Ang dormintoryo kabahin sa Pantawid Pamilyang Pilipino Program kon 4Ps sa departamento, nga nagpahimug-at sa importansya sa edukasyon alang sa mga benepisyaryo, ilabi na sa Geographically Isolated and Disadvantaged Areas kon Gida.
Usa sa mga nag-unang estratihiya ubos sa 4Ps mao ang Enhanced Support Services Intervention kon ESSI, nga nagasuporta sa “marginalized” nga mga komunidad, lakip niini ang Indigenous Peoples sa Paquibato District, Davao City.
Ang programang 4Ps, gilunsad niadtong 2008 ug giestablisar pinaagi sa Republic Act No. 11310 niadtong 2019, nga mao ang “national poverty reduction and human capital investment strategy.”
Naghatag kini og conditional cash transfers ngadto sa mga benepisyaryo hangtud pito ka tuig, tumong niini mao ang pagpalambo sa panglawas, nutrisyon, ug edukasyon.
