DAVAO CITY – Gi-aprubahan na atol sa special session sa City Council kagahapong adlawa ang ihatag nga donasyon ngadto sa mga nabiktima sa kusog nga linog partikular na sa Padada Davao del Sur ug gi-andam na sab ang alang sa uban pa nga lugar nga nakasinate sab og kadaut.
Kahinumduman nga dili na bag-o sa siyudad ang paghatag og hinabang sa uban nga lugar panahon nga adunay masinatian nga kalamidad.
Gibasehan sumala pa sa siyudad ang paghatag og hinabang sa gihimong assessment sa Disaster team nga gipadala sa dakbayan sa nahisgutan nga lugar aron pagsubay kung pila ang gikinahanglan nga assistance nga itunol sa Padada.
Nasayran sab kang Konsehal Danilo Dayanghirang nga buot sab nga tabangan sa dakbayan ang uban pang dapit sa Davao del Sur nga apektado sab sa linog apan kulang sumala pa ang dokumento nga usa sa basehan sanglit istrikto niini ang Commission on Audit (COA).
Nasayran nga kantidad sa P300,000 ang itunol sa Padada, Davao del Sur.
