Giklaro sa Department of Justice (DOJ) nga lahi ang kaso sa sedisyon batok kang Vice President Sara Duterte kung itandi sa iyahang giatubang nga impeachment.
Sumala kang Justice Spokesperson Atty. Polo Martinez, walay epekto ang sedition case sa proseso sa pagdungog sa impeachment complaint nga gisang-at batok sa bise presidente. Matod pa niya, ang impeachment complaint ug criminal complaint lahi ug dili parehas ang proseso sa pagdungog niini.
Kahinumduman nga gipasakahan si Vice President Sara Duterte og kasong sedisyon ug grave threats sa National Bureau of Investigation niadtong 2025.
Nasunod kini human sa iyang dayag nga pagpanghulga sa kinabuhi nila Pangulong Ferdinand “Bongbong” Marcos Jr., First Lady Liza Araneta-Marcos, ug kanhi House Speaker Martin Romualdez.
Ang maong pahayag gigamit usab isip usa sa mga basihan sa impeachment complaint batok kang VP Sara nga karon ginadungog sa komite sa Kongreso.
Apan, gibutyag sa DOJ nga dili kini makaapekto sa mga kaso nga giatubang sa ikaduhang pangulo sa ilahang departamento.
