Kumpyansa ang Department of Justice nga mabalik sa Pilipinas si kanhi Ako Bicol Party-list Representative Zaldy Co gikan sa Czech Republic.
Sumala kang Justice Secretary Fredderick A. Vida, 99% ang iyang kasiguruhan nga mabalik sa nasud ang maong puganteng kanhi magbabalod.
Apan giangkon niya nga dili pa sila makahatag og tukmang timetable o petsa kung kanus-a gayud kini mahitabo. Dili usab niya gustong manguna sa desisyon sa gobyerno sa Czech Republic nga adunay hurisdiksyon sa kanhi kongresista karon.
Si Secretary Vida, uban ni Justice Chief State Counsel Dennis Chan, anaa karon sa Czech Republic aron makigpulong sa mga awtoridad niini.
Tumong sa ilang pagbisita ang pag-abri sa pormal nga dayalogo tali sa Pilipinas ug sa maong nasud aron hisgutan ang kaso ni Zaldy Co.
Matod pa niya, prayoridad kini sa ahensya tungod kay nagatutok usab ang publiko sa sunod nga mahitabo kung mabalik na ang kanhi magbabalaod.
Mahitungod sa posibilidad nga mangayo og asylum si Zaldy Co, gibutyag sa kalihim nga ilang siguruhon nga modaog gihapon ang gobyerno ug mabalik siya sa nasud.
Samtang sa usa ka pamahayag giangkon ni Justice Spokesperson Atty. Polo Martinez nga wala pay kasiguruhan kung kauban nila sa pagbalik sa Pilipinas ang kanhing kongresista.
