Subling nagpahibalo ang Department of Health Davao Center for Health Development, uban na sab ang DOH Retained Hospitals ug kapulisan, ngadto sa publiko sa pagtamod sa mga sumbanan labot sa pagpabiling luwas ug hapsay, samtang ginasaulog ang holiday season.
Sumala pa ni Dra. Annabelle Yumang, ang Regional Director sa DOH XI, nga og mamahimo, dili gayod mugamit og pabuto, sa gawas man o sulod sa panimalay.
Subay sa datos gikan sa ilahang buhatan, anaa matud pa sa 21 ka mga Fireworks Related Injuries ang rehiyon dinhi sa Davao, diin 20 niini maoy nabiktima sa gumikan sa mga pabuto, ug usa sab ang naangol gumikan sa mga saag nga bala, sukad niadtong Disyembre 21 2023, hangtod Enero 6 ning kasamtangang tuig.
Sagad sa pipila ka mga dapit maoy nahitabuan sa mga adunay nangaangol gumikan sa pabuto, mao ang Davao De Oro ug Davao Del Norte, diin nakatala kini og walo ka mga naangol, samtang upat sab sa Davao Del Sur ug tulo sa Davao Oriental, ug ang pinakabata niini anaa sa otso-anyos ug ang pinakatigulan anaa sa 75-anyos.
Matud pa ni Yumang, nga anaa sumala pa sa 133% ang pag-usbaw sa ihap s amga FWRI, tandi sa susamang panahon kaniadtong 2022-2023 nga adunay 9 ka mga insidente.
Giawhag na sab karun ang mga katawhan nga kinahanglan nga palabihong kaunon ang mga healthy nga mga pagkaon, inay kadtong mga tam-is ug mantikaong mga pagkaon, aron nga malikay niini sa mga posibleng sakit nga makuha sa mga pagkaon.
