Gipaklaro sa Department of Health (DOH) nga walay bagong virus nga nagakalat sa nasud bisan paman sa pagdaghan sa kaso sa influenza-like illnesses (ILI) karong flu season.
Subay sa datos sa ahensya, ang tulo ka nag-una nga hinungdan sa influenza-like illnesses (ILI) mao ang Influenza A, Rhinovirus ug Enterovirus, samtang ang SARS-CoV-2 o o COVID-19 virus anaa lamang sa ika pulo nga pwesto.
Sa usa ka pamahayag, gitagaan og himbugaton sa ahensiya nga adunay katungod ang local government units (LGUs) sa ilawon sa Republic Act No. 11332 nga magpatuman og mga health measures subay sa sitwasyon sa ilang ginsakupan.
Kini human nga nagpatuman ang lokal nga panggamhanan sa Quezon og mandatoryo nga pagsout og face mask sa indoor ug outdoor settings nga walay physical distancing gumikan sa nagataas nga kaso sa mga nagkasakit sa maong lugar.
Dugang pa sa ahensya nga panahon karon sa trangkaso, maong kinahanglan ipatuman ang mga basic health practices susama sa kanunay nga paghugas og kamot, pagsul-ob og face mask, magpabakuna, pagtabun sa baba kung muubo, mukaon og masustansya nga pagkaon, mag-exercise, ug likayan ang mga bisyo nga makadaot sa panglawas.
Samtang, sa ulahing datus sa DOH, mikabat sa kapin 133,000 ang kaso sa ILI kaniadtong Setymbre, ubos kini kung itandi sa 155,000 ka kaso sa susama nga bulan kaniadtong milabayng tuig.
Kahinumdoman nga gipaklaro na ni Health Secretary Ted Herbosa, nga walay igong rason aron magdeklara og lockdown bisan paman nga daghan na og nagkasakit sa nasud, gumikan nagagikan sumala pa ang maong sakit sa nagkadaiyang matang sa virus ug wala sumala pa’y outbreak gikan sa usa ka virus.
Apan, bisan paman niini girekomenda sa DOH ang pagsout og face mask o magpabilin na lamang sa balay kung adunay sakit.
