Gipadayag sa Department of Health (DOH) nga 55 lamang ka kaso sa mpox ang ilang natala sa nasod gikan Enero 4 hangtod Hunyo 13 karong tuiga. Sumala pa kang DOH Spokesperson Dr. Albert Domingo, ubos kini og 79 porsiyento kumpara sa 205 ka kaso nga narekord sa samang panahon niadtong miaging tuig.
Dugang pa niini, gipasiugda sa DOH nga wala’y outbreak o pagsaka sa ihap sa mga kaso sa mpox sa nasod sa pagkakaron.
Lakip sa gipatin-aw sa ahensya nga dili nila ipagawas sa publiko ang detalye sa matag kaso aron malikayan ang stigma ug mapanalipdan ang pribasiya sa mga pasyente. Hinuon, ang mga lokal nga panggamhanan maoy responsable sa pagpahibalo sa publiko kabahin sa mga kaso sulod sa ilang mga lugar.
Kahinumduman, migawas ang maong pahayag human gikumpirma sa lokal nga panggamhanan sa Mandaluyong ang usa ka kaso sa mpox, diin gilayon nilang gipahigayon ang contact tracing ug uban pang preventive measures aron mapugngan ang posibleng pagkatap sa maong sakit.
