Gipa-igmat sa Department of Health (DOH) ang tanang sa mga sakit nga adunay kalabutan sa Holiday heart syndrome karong kapaskuhan ug bag-ong tuig.
Sa usa ka statement, nagkanayon ang ahensya nga ang holiday heart syndrome mao ang usa ka kondisyon nga dala sa grabeng pag-inom ug ilimnong makahubog, stress, kulang sa pahuway ug pagkaon og parat o tambok nga pagkaon nga makapasaka sa presyon.
Kini ang mamahimong muresulta sa arrhythmia o abnormal nga heart rhythm nga usa sa hinungdan sa stroke.
Gibuhat sa DOH ang maong pahinumdum atol sa gibuhat nga Ligtas Christmas Hospital Preparedness and Response Rounds sa DOH isip pag-andam karong kapaskuhan.
Sa pagsuroy a DOH, gipakita sa Philippine Heart Center (PHC) nga miabot sa kapin kon kulang 60 ka mga kaso sa Stroke gikan Hulyo hangtud Nobyembre 2024 nga gitutukan sa ospital.
Samtang adunay natala nga 7 ka mga kaso sa stroke ayha pa man nagpasko gikan Disyembre 1 hangtod Disyembre 20 ning tuiga lamang.
Mamahimo usab nga mosaka pa ang ihap sa mga kaso sa stroke human ang pasko ug pagsugat sa bag-ong tuig kung dili mapugngan ang graben pag-inom og ilimnong makahubog ug pagkaon gikan sa nagsunod nga mga handa.
Nakita sa balay tambalanan ang susamang pagsaka niadtong nakalabay’ng tuig.
Sumala sa PHC nga niadtong Disyembre 2023, miabot na sa 38 ang ihap sa kaso sa stroke sa ospital nga misaka sa 42 pag-abot sa Enero 2024. Kini ang pinakataas nga ihap sa stroke nga natala sa ospital sa tibuok tuig.
Samtang ang 110 ka kaso sa Acute Coronary Heart Syndrome nga natala sa PHC sa Disyembre 2023 ang misada sa 115 pag-abot sa Enero 2024.
Padayon usab ang pag-awhag sa DOH sa matag pamilya nga ipabilin ang kahimsog sa panglawas pinaagi sa saktong pagkaon, regular ga ehersisyo ug disiplina panahon sa kapaskuhan ug sa pagsugat sa bag-ong tuig.
Nagpahinumdum usab si DOH Secretary Ted Herbosa nga likayan ang sobra nga pagkaon karong holiday season ug mas daghanon ang pagkaon ug gulay ug mga prutas.
