DAVAO CITY – Nagpagula ang Department of Health 11 sa guidelines nga gipagula sa DOH Central Office kalabot sa home isolation sa mga COVID-19 patient.
Sumala sa nagapangulo sa Regional Epidemiology and Surveillance Unit nga si Dr. Rachel Pasion, nga dili basta-basta nga kung anaa ra sa balay, matawag nang home isolation.
Kinahanglan usab nga muagi sa assessment ang gambalay kung haum kini sa home isolation, sama na lang kung adunay kaugalingong kwarto, banyo, ug aduna usab access sa uban pang amenities nga dili makaapekto sa uban pang nanimuyo sa nasangpit nga gambalay.
Musubay usab sa pagsusi sa lisensyadong doktor ang pasyente kung mamahimo kining mahimutang sa home isolation, o kung aduna ba kini lain pang balatian, ug kung duna ba kini sintomas.
Importante usab sumala kaniya nga adunay komunikasyon sa health care provider nga mag-monitor sa pasyente matag karon ug unya.
Kahinumduman nga miuyon na ang Davao City LGU sa home isolation human nga namatikdan niini nga padayon ang pagsaka sa mga kaso sa COVID-19 sa Dakbayan.
