Mag-atubang og kaso ang usa ka Dog handler nga pagsupak sa RA 8485 kon Animal Welfare Act of 1998 gumikan sa gihimong pagdagmal sa usa ka Shih Tzu sa dakbayan sa Panabo.
Giila ang Dog handler nga si alyas Lito, 24-anyos, ulitawo nga residente sa Purok 21, Barangay San Vicente, Panabo City, Davao del Norte.
Makita sa video nga gidagmalan sa nahisgutan ang maong Iro pinaagi sa pagsumbag ayha niini gilumsan sa tub tungod hapit kini nakaapak kaniya sa Pet Grooming Shop sa Purok Mangga, Teachers Village, Barangay Sto. Niño, Panabo City.
Nasayran nga gipanag-iyahan ang iro sa usa ka Julie Marie Paring Gentiles. Subay sa pamahayag sa tag-iya nga pasado alas 5:00 sa hapon iyahang gibalikan ang iyahang binuhi nga gipa-groom sa maong shop. Apan nakurat na lamang kini nga nakit-an ang iyang iro nga wala na’y kinabuhi sulod sa kulungan.
Sa iyahang pagsusi, gikanayon sumala pa sa usa ka nakakita nga gidagmalan sumala sa Dog handler ang iyahang Iro. Paghuman sumala pa sa nahitabo, misibat kini ug wala na mananghid sa iyahang gitrabahu-an.
Nasayran nga nakig-alayon na usab ang tag-iya sa hayop ngadto sa City Veterinary Office sa nasampit nga syudad alang sa koordinasyon sa Philippine Animal Welfare Society kon PAWS kabahin sa kasong ipasaka.
