Gipakusgan karon sa Department of Energy (DOE) kauban ang kapulisan ang pagbantay batok sa mga mapahimuslanong gasolinahan human sa gilauman nga dako nga pagsaka sa presyo sa petrolyo karong semana tungod sa kagubot sa Middle East.
Isip lakang, nakigkuyog ang DOE sa Department of Information and Communications Technology (DICT) aron maglusad og electronic complaint platform.
Sa ingon niini nga paagi, makasumbong ang mga konsumante batok sa mga istasyon nga giisip nga nilapas sa fuel pricing rules o nakasinati og kakulang sa suplay.
Sumala sa ahensya, sayon lamang ang pagpadala og reklamo pinaagi sa eReport tab sa eGov application.
Kinahanglan lamang pilion ang opsyon nga Gas Station Concerns, pun-on ang mga kinahanglanong detalye, ug tukion kung ang insidente ba karong nahitabo o naobserbahan sa mga nakalabay nga adlaw.
Gawas sa teknolohiya, nakig-uban na usab ang DOE sa Department of the Interior and Local Government (DILG) ug Philippine National Police (PNP) aron palig-onon ang pagbantay batok sa hoarding ug profiteering.
Gihangyo sa gobyerno ang publiko nga gilayon nga i-report ang bisan unsang kadudahang kalihokan sa mga gasolinahan.
