DAVAO CITY – Lauman nga mapagawas na karong bulana ang resulta sa DNA test gikan sa Forensic Unit Team sa nagpadayong imbestigasyon sa kamatayon nila Jeff Predas ug Jennifer Chavez nga kahinumdumang napalgang wala nay kinabuhi sa usa ka condominium sa Davao City niiadtong Abril 21.
Sumala ni Davao City Police Office spokesperson nga si Police Major Hazel Tuazon nga ilang gilauman nga makatabang ang test results sa pag-ila sa mga nagpatay sa mag-trato.
Dugang pa ni Tuazon nga kon mag-link ang resulta sa DNA sa duha ka persons of interest nga giilang sila alyas Clark ug alyas Ivan ngadto sa crime scene, mag-atubang sila og kasong double murder.
Nagpadayon ang imbestigasyon sa kapulisan, nga nagtutok sa crime of passion ug personal nga pagdumot nga posibleng motibo sa maong krimen.
Pagpaklaro pa niini nga dili pa una makonsidera ang pagmugna og Special Investigation Task Group kon SITG.
Hiunon, nagpahigayon ang DCPO og peace conference nga naglambigit sa Criminal Investigation and Detection Group (CIDG), Forensic Unit Team, ug uban pang stakeholders aron mapadali ang imbestigasyon.
Kahinumduman nga unang gibutyag ni DCPO Director Police Col. Richard Bad-ang nga dunay mga nakitang dugo sa elevator, 6th floor, 7th floor, towel sa condo unit 323 ug mismong sa sapatos nga gigamit sa Person of Interest.
