DAVAO CITY – Gikabutyag sa Davao City Police Office nga wa motakdo ang resulta sa DNA test sa magtiayong gipatay sa usa ka condominium building sa Bajada, Davao City niadtong Abril 21 sa blood samples sa duha ka persons of interest (POIs) sa insidente.
Sumala pa ni DCPO Spokesperson Police Captain Hazel Tuazon nga nag-match sa maong test ang usa sa mga biktima nga si Jeff Patac Predas, kinsa gidunggab hangtod namatay una pa gilabay gikan sa ilang giabangan nga unit sa ikalimang andana.
Hinuon, giklaro sa Davao City Police Office (DCPO) nga dili kini makatarunganon nga tapuson ang kaso tungod gipaubos pa sa DNA testing ang ubang mga sample, lakip na ang mga lama sa dugo nga nakolekta gikan sa daghang mga lugar.
Ang POI nagpabilin nga persons of interest, samtang nagpadayon ang imbestigasyon.
Kasamtangang naa sa ilang lungsod sa Sultan Kudarat, Maguindanao ang gitumbok nga mga suspek apan gawasnon kini sa bisan unsang kaso sanglit walay kaso nga napasaka batok kanila.
Usa ka suspek ang gituohang klasmeyt ni Jennifer Delos Santos Chavez ug nagpa-book pa sa lovers’ room sa maong condo unit.
Gitutokan sa mga awtoridad ang “crime of passion” ug “personal grudge” isip motibo sa krimen.
Gikuptan pa ning kasamtangan ang resulta sa DNA test sa mga otoridad samtang nagpaabot sa opisyal nga hard copy nga gipirmahan sa kadagkoan sa Davao City Forensic Unit (DCFU) aron isumite sa Bajada Police Station.
