Naghatag og dakong kahigayunan sa power supply ang awtomatikong pagkapasa sa House Bill 11072 nga nahimong balaod niadtong Abril 6, 2025, bisan wala kini pirmahi ni Pangulong Ferdinand Marcos Jr. Ang balaod nagtugot sa pagpalapad sa prangkisa sa Davao Light and Power Company (DLPC) sa mga lugar nga kaniadto gilangkoban sa Northern Davao Electric Cooperative (Nordeco).
Makatagamtam na sa serbisyo sa DLPC ang mga lugar sama sa Tagum City, Island Garden City of Samal, ug ubang munisipyo sa Davao del Norte ug Davao de Oro. Lakip sa mga lugar nga maserbisyohan mao ang Asuncion, Kapalong, New Corella, San Isidro, Talaingod, Laak, Mabini, Maco, Maragusan, Mawab, Monkayo, Montevista, Nabunturan, New Bataan ug Pantukan.
Gilauman sa Davao Consumer Movement (DCM) nga ang maong kabag-ohan magdala og mas paspas, kasaligan ug mapuslanon nga serbisyo sa kuryente. Ilang gituohan nga makapadali kini sa pag-uswag sa mga komunidad ug makahatag og dugang oportunidad sa lokal nga ekonomiya.
