DAVAO CITY – Gisiguro sa usa ka opisyal sa Northern Davao Electric Cooperative kon NORDECO nga ikalipay sa mga konsumante ang ilang gidalit nga diskwento sa balayrunon sa kuryente.
Pagbutyag sa information officer sa kumpanya nga si Regie Ringo, subay ang maong diskwento sa balaod ilawom sa Republic Act 11552 nga nag-amyenda sa Republic Act No. 9136 kon Electric Power Industry Reform Act of 2001 nga nag-amyenda sa ubos nga Life Line Rate ilabi na sa ilang mga kabus nga myembro.
Nagsunod sab kini sa mga mga guidelines nga gihan-ay sa Energy Regulatory Commission kon ERC.
Gipasalig sa NORDECO ang dakung kahupayan nga hatud niini sa mga myembro-konsumante ilabi nang maghatag kini og percentage discount nga magpakunhod sa singilan sa kuryente.
Kahinumduman nga giulan og reklamo ug batikos gikan sa mga konsumante ang NORDECO tungod sa ilang taas nga singil sa kuryente.
Gilaumang makabenepisyo niini ang ilang mga konsumante sa Davao de Norte ug Davao de Oro.
Sa mga buot makahigayon sa maong dalit, mamahimo ang mga myembro nga muadto sa NORDECO offices alang sa mga gikinahanglang rekisitos.
via || Bombo LJF
