Gipasigarbo sasa probinsya sa Davao De Oro ang mga kalamboan ug mga kalampusan nga nahimo sulod sa pipila ka mga bulan nga pagdumala sa mga bag-ong lideres sa maong probinsya.
Bisan pa sa bag-ohay nga pagbaha ug epekto sa shear line nga nakaapekto sa pipila ka komunidad, nagpadayon ang Provincial Government sa paghatag og nag-unang serbisyo samtang ginaduso ang mga programa sa kalamboan, matod sa pamahayag ni Governor Raul Mabanglo atol sa iyang Governor’s Report niadtong Marso 2 sa Bulawan Events Center sa Nabunturan.
Nagpadayon pa ang relief operations sa mga apektadong barangay, ug naihatag na ang ayuda sa mga pamilyang naapektuhan tungod sa baha ug uban pang katalagman.
Sulod sa milabay nga walo ka bulan, nag-atubang ang probinsya sa sunod-sunod nga mga hagit lakip ang landslide ug grabeng kalit nga pagbag-o sa panahon, samtang gipadayon ang walay hunong nga paghatag og serbisyo publiko.
Gawas sa disaster response ug recovery efforts, gipasiugda usab ni Mabanglo ang kalampusan sa pipila ka importanteng sektor.
Sa hisgutanang panglawas, gipalapdan ang serbisyo pinaagi sa pagtukod og BUCAS Center sa pakigtambayayong sa Davao Regional Medical Center, pagpaayo sa upat ka provincial hospitals, ug paglusad sa Kalamboan Serbisyo Caravan nga nagdala og medikal nga serbisyo duol sa mga komunidad.
Gipalig-on usab ang social services pinaagi sa pagtukod og 11 ka Maduolan Centers sa tibuok probinsya ug pagpalapad sa crisis support programs nga nakatabang na sa liboan ka mga residente.
Nagpadayon usab ang mga proyekto sa imprastraktura, lakip ang pagpaayo sa mga karsada ug pampublikong pasilidad aron masiguro ang akses sa serbisyo bisan sa panahon sa emerhensiya.
Gipakusgan ang suporta sa sektor sa agrikultura pinaagi sa paghatag og farm inputs ug pagpatuman sa rice processing system nga gitumong sa pagpalig-on sa food security ug pagdugang sa kita sa mga mag-uuma.
Gipalapdan usab ang scholarship programs ug gipadako ang pondo sa sports development aron masuportahan ang edukasyon ug partisipasyon sa kabatan-onan sa tibuok probinsya.
Gihisgutan usab ni Mabanglo ang padayong kolaborasyon sa silingang probinsya, ilabina sa Davao Oriental, ug sa pribadong sektor isip yawe sa pag-abri og dugang oportunidad sa turismo, negosyo ug trabaho.
Samtang ginasaulog ang Bulawan Festival, gibutyag ni Mabanglo ang kamahinungdanon sa padayon nga panaghiusa tali sa gobyerno ug komunidad aron masiguro ang lig-on nga kalamboan bisan pa sa nagbalik-balik nga mga hagit.
Gipunting niini nga ang tinuod nga kusog sa probinsya nagagikan sa katawhan, nga iyang gihulagway isip tinuod nga “Bulawan” sa Davao de Oro.
“Sa atong lig-on nga kolaborasyon, usa lang ang klaro nga mensahe. Ako, kamo, kitang tanan instrumento sa pagkab-ot sa kalamboan sa Davao de Oro. Kamo ang tinuod nga bulawan,” matod niya.
Sa nahimong pagtapos sa gobernador nagpasalamat kini kang Maricar Zamora-Mabanglo, Leonel Ceniza, ug sa tanan niining kauban sa serbisyo publiko nga iyang gihulagway isip mga yawe nga kaalyado sa pagpauswag sa probinsya pinaagi sa padayon nga panaghiusa ug hiniusang responsibilidad aron mapadayon ang kalamboan ug masagubang ang umaabot pang mga hagit sa Davao de Oro.
