DAVAO CITY – Hingpit na nga nanumpa isip bag-ong bise mayor sa dakbayan sa Davao si Konsehal Bernard Echavez Al-ag.
Nasayran nga alas 4:50, Miyerkules sa hapon, human nanumpa isip vice mayor sa Davao si Al-ag sa opisina ni Mayor Sara Duterte-Carpio kauban ang mga kabanay niini.
Si Al-ag ang gikan sa ikatulong distrito nga nakakuha ug mas taas nga porsiento sa boto sa tanang mga konsehal kung itandi sa una ug ikaduha ka distrito.
Kauban si Al-ag sa line-up kaniadto ni kanhi mayor ug kasamtangang Pangulong Rodrigo Duterte sa local party nga gitawag ug Hugpong sa Tawong Lungsod.
Nahimo usab siyang nga majority floor leader sa konseho ug alumnus sa Centro Escolar University.
Nasayran nga No. 7 sa national board examination for optometry ang nahisgutang opisyal.
Gikonsidera pa niini nga “disruption” sa iyang plano ang pagkabutang sa maong posisyon tungod sa laraw niya nga humanon ang iyahang termino sa tuig 2019 ug pagbalik niini isip usa ka yanong lumulupyo sa katilingban.
