Gimanduan sa Department of the Interior and Local Government (DILG) ang tanang local government units sa tibuok nasud nga gilayong tangtangon ang mga ngalan, hulagway, ug uban pang mga ilhanan sa mga opisyal sa mga proyekto ug programang gipondohan sa gobyerno.
Ilawom sa Memorandum Circular No. 2026-006, gidili ang pagbutang sa ngalan, imahe, logo, slogan, color scheme, o bisan unsang simbolo sa public official sa mga project signage, tarpaulin, ug uban pang mga materyales nga gipondohan sa gobyerno.
Sumala ni Interior Secretary Jonvic Remulla, ang mga proyekto sa gobyerno naggikan sa buhis sa katawhan ug dili angay gamiton alang sa personal nga promosyon sa mga opisyal.
Nakalatid usab nga ang maong mando nahisubay sa 1987 Constitution, Code of Conduct and Ethical Standards for Public Officials, mga lagda sa Commission on Audit, ug sa 2026 General Appropriations Act.
Nagpahimangno si Remulla nga ang mga molapas niini mahimong mag-atubang og preventive suspension ug administrative cases, ug gihangyo niini ang publiko nga i-report ang mga paglapas sa mga nahisgutan.
