Gilimod sa Department of Interior and Local Government (DILG) ang nikatag nga balita kabahin pagpangayo og tubag kay Davao City Mayor Sebastian “Baste” Duterte kung nganong wala kini atol sa nasinatiang pagbaha sa pipila ka bahin ning dakbayan.
Subay sa gipaguwa nga pamahayag sa DILG, nihatag og katin-awan si DILG Secretary Benhur Abalos nga walay kamatuoran ang nikatag nga balita nga una na usab nakaani og managlahing reaksyon sa social media.
Kahinumduman nga nakasinati og mga pag-ulan nga miresulta sa pagbaha ang pipila ka dapit sa syudad partikular na sa may Toril, diin nahimong sentro sa hisgutanan ang matud pa wala pagpakita ni Mayor Baste aron sa pagtabang sa mga apektadong pamilya.
Nakatampo usab sa hisgutanan ang matud pa pagtambong ni Mayor Baste sa Tacloban City kauban ang amahan nga si kanhi pangulong Rodrigo Duterte.
Gumikan niini, niguwa ang mga balita nga sumala pa patubagon sa DILG ang mayor sanglit nakalatid na sa Local Government Code ang pagkinahanglan sa local chief executive sa iyang area of responsibility panahon sa kalamidad aron masiguro ang kaluwasan sa iyang katawhan.
Gani, nakaani sab og managlahing reaksyon ang maong balita gikan sa mga dabawenyo nga sumala pa dili matagna ang maong panghitabo rason nga dili dapat basolon ang mayor.
Ning kasamtangan, wala pa nihatag og pamahayag si Mayor Baste kalabot sa maong balita, apan gilimod na sa DILG ang maong isyu nga matud pa walay kamatuoran.
