Giimbistigahan karon sa Department of the Interior and Local Government (DILG) ang pipila ka mga mayor ug lokal nga opisyal sa Cebu nga mibyahe padulong sa Europa samtang padayon nga giigo sa Bagyong Tino ang probinsya, nga nagdala og grabeng kadaut ug nakapatay sa kapin usa ka gatus ka tawo.
Sumala ni Assistant Provincial Administrator Aldwen Empaces, gimando sa DILG Central Office ang Kapitolyo sa Cebu nga magsumite sa mga travel order ug ubang mga dokumento aron masuta kung adunay legal nga basihanan ang mga biyahe sa maong mga opisyal.
Sumala pa nga lakip sa mga gihatagan ni Gov. Pamela Baricuatro og Foreign Travel Authority (FTA) mao ang pito ka alkalde gikan sa lain-laing lungsod sa Cebu, ingon man usab si Provincial Board Member Andrei Duterte.
Gipaklaro usab ni Gobernadora Baricuatro nga ang mga travel authority gipirmahan sa wala pa moigo ang bagyo ug uban pang kalamidad sa rehiyon.
Samtang niining panahona, si Tourism Secretary Christina Garcia Frasco anaa sa London niadtong Nobyembre 4 isip lider sa delegasyon sa Pilipinas sa World Travel Market.
Pagkadungog sumala pa sa katalagman, dali siya nga nibalik sa nasud uban sa iyang bana nga si 5th District Representative Duke Frasco, aron pangunahan ang mga relief operations sa Cebu.
