DAVAO CITY – Subling gipahimangnoan karon sa ahensiya sa Department of the Interior and Local Government-Davao Region (DILG-Davao) ang tanan nga mga local government units (LGUs) ug election candidates nga tangtangon ang mga campaign-related waste materials.
Una ng gibutyag ni DILG-Davao Director Alex Roldan nga nakapagula na sila ug pahimangno nga nagpahinumdom sa mga LGU ug kandidato nga tangtangon ang ilang mga campaign paraphernalia sulod sa tulo ka adlaw human ang eleksiyon apan kamatikdan nga nagpabilin pa gihapon ang pipila niini.
Mamahimo sumala pa kini nga gamiton isip ebidensiya batok sa usa ka kandidato sa iduso nga reklamo.
Kahinumduman nga una na sab nga nagpahimangno si Commission on Elections-Davao Region (Comelec-Davao) assistant regional director Gay Enumerables ngadto sa mga kandidato nga sugdan na ang pagtangtang sa ilang mga posters ilabi na nga natapos na ang eleksiyon.
Ayha pa man ang gipahigayon nga eleksiyon, nagpagula ug kamandoan ni Mayor Inday Sara Duterte pinaagi sa Executive Order No. 15, Series of 2022 nga nagmando sa local candidates nga i-retrieve, re-use, ug i-recycle ang tanan nga mga national ug local election campaign paraphernalia.
