Gipaklaro ni Department of the Interior and Local Government Secretary Jonvic Remulla nga wala matud pa silay gikasa nga manhunt operation ang DILG batok kang kanhing Presidential Spokesperson Harry Roque.
Tubag kini ni Remulla, human sa usa ka taho nga nagtago-tago na karun si Roque human nga nagpaguwa og arrest order ang Quad Committee sa Kamara batok kang Roque ug sa asawa niining si Mylah Roque, human nga wala kini misipot sa mga pagdungog labot sa imbestigasyon sa operasyon sa POGO sa Porac, Pampanga.
Gikanayon ni Remulla, nga ang aduna lamang sa karun mao ang subpoena ug ang contempt order sa magtiayong Roque gikan sa House of Represenatatives nga dili matud pang makonsiderang krimen.
Dugang pa niini, nga mulihok lamang ang pulisya og mupakanaog og hukom ang korte nga magpaguwa og warrant of arrest ngadto sa nahisgutan.
Hinuon, giklaro ni Remulla nga ang pagpangita kang Roque maoy trabaho sumala pa sa Office of the Segeant at Arms sa maong kapulungan.
Kahinumdumang, una nang gihimakak ni Roqua ang maong alegasyon nga nahimo kining abogado sa Lucky South 99 nga gi-raid sa mga otoridad.
