DAVAO CITY – Ma-access na sugod karong adlawa sa mga Dabawenyo ang digital vaccination certificate sa nasud nga VaxCertPH.
Gikanayon ni Engr. Albert Gabriel sa Department of Information and Communications Technology kon DICT Mindanao Cluster 3, nga mamahimong ma-access ang self-service portal pinaagi sa laptop ug computer.
Dali ra usab kini ma-save ug ma-dowload, ug mamahimo usa nga ma-print.
Tumong usab sa VaxCertPH nga ihiusa ang vaccination certificate sa nasud sanglit managlahi ang format sa physical vaccination cards, ug aduna usab mga higayon nga wala kini giila sa ubang mga nasud.
Busa, gibuhat sa ahensya ang sistema nga magsilbing ilhanan nga bakunado na ang usa ka tawo, ug aron maila usab kini sa ubang mga nasud.
Una nga gi-test karong bulana ang VaxCertPH alang sa mga Pilipino padulong abroad nga taga-National Capital Region ug Dakbayan sa Baguio sanglit sila ang kasagarang nanginahanglan niini aron makasulod sila sa nasud nga ilang trabahuan.
Nagpasalig usab si Gabriel nga luwas ug secure ang mga impormasyon sa ilang database.
Ila usab gimanduan ang mga LGU nga kinahanglan tama ang impormasyon sa ilang database ayha kini nila ipasa sa sistema sa VaxCertPH.
