DAVAO CITY – Anaa sumala pa sa 16 ka mga production wells sa Davao City Water District (DCWD) nga sakop sa mga propedad niini nga walay titulo ang delikado nga pangtangtangon sa maong area nga maoy hinungdan nga posibleng maapektohan ang paghatag nila ug serbisyo sa ilang mga konsumante.
Sa bag-ohay pa lamang nga Commission on Audit (COA) 2016 report nga gipagula sa milabay nga semana, nasayran nga 23 ka mga propedad sa ahensiya, 16 production wells ang wala titulo.
Nasayran sa COA nga ang mga nagkadaiyang pasilidad ug ekipo nga gimuntar sa mga apektadong production wells ang mobalor ug P42,438,733.79.
Gipahibalo sa DCWD finance officer ang COA nga mamahimong bungkagon sa mga nanimuyo sa maong area ang maong pasilidad nga posibleng maoy hinungdan nga maapektohan ang iyang serbisyo ngadto sa ilang mga kosumante gumikan sa luna nga adunay legal complications.
Aduna sab sumala pay posibilidad nga dili masikaso sa ahensiya ang mga land titles ilabi na nga pipila sa mga donors sa luna ang mipanaw na.
Una ng gi-angkon sa ahensiya nga pipila sa ilang propedad ang gidonar lamang apan kulang sumala pa ug mga gikinahanglan nga dokumento sama sa notarized deed of donation aron nga paspas nga mabalhin ang luna ilalom sa pagdumala sa usa ka distrito diin kini nahimutang.
