DAVAO CITY – Gibarugan sa Department of Education (DepEd) 11 nga andam na sila sa pag-abli sa klase karong bulan sa Oktubre 5 luyo sa panawagan nga “academic freeze” gumikan pa gihapon sa kaso sa Covid-19.
Gipasabot ni Deped spokesperson Jenielito Dodong Atillo nga dili mamahimong i-kompromiso ang edukasyon sa mga kabataan ug kinahanglan pa gihapon ug mga lakang aron lamang mapadayon sa mga nahisgutan ang ilang pagtuon bisan nga adunay gi-atubang suliran ang nasod nga hatud sa pandemiya.
Gitataw sab ni Atillo nga susama na karon nga andam ang mga pribado ug pampublikong tulonghaan nga magpadayon sa klase.
Gikanayong ayha sugdan ang klase sa mosunod nga bulan, mipailalom na ang mga magtutudlo sa nagkadaiyang seminar sa DepEd kini aron masiguro nga andam na ang mga nahisgutan sa himuon nga blended learning o kung paunsa nila mapasabot pag-ayo ngadto sa ilang mga estudyante ang ilang mga leksiyon.
