DAVAO CITY – Luyo sa nagpadayon nga bahad sa corona virus disease (Covid-19) nanawagan pa gihapon ang ahensiya sa Department of Education (DepEd) 11 ngadto sa mga ginikanan nga ipa-enroll pa gihapon ang ilang mga anak.
Una ng gibutyag ni DepEd spokesperson Jenielito Dodong Atillo nga wala pay kasiguruhan sa kasamtangan kung kanus-a matapos ang Coronovirus Disease 2019 (Covid-19) ilabi na nga walay bakuna nga pangontra niini.
Gipasalig sa ahensiya nga gi-andam na nila ang mga pamaagi sa pagtudlo aron nga malikayan ang nahisgutan nga virus diin kalakip niini ang online ug off-school modular nga pamaagi sa pagtudlo kini aron masiguro nga dili magdasok sa mga tulonghaan ang mga tinun-an.
Gawas niini, mamahimo sab sumala pa nga gamiton ang uban nga mga teknolohiya sama sa telebisyon ug radyo alang sa mga lugar nga walay internet signal.
Hinuon anaa pa gihapon sa mga ginikanan ang mamahimong desisyon kung pasudlon nila sa trabaho ang ilang mga anak karong tuiga o pa-undangon una kini tungod sa nahisgutan nga virus.
Una ng gibutyag sa DepEd nga posibleng sa bulan sa Agosto sugdan ang pag-abli sa klase sa mga pampublikong tulonghaan karong tuiga.
