DAVAO CITY – Giuyunan sa tigpamaba sa Department of Education 11 ang nahimong tambag ni Vice President ug Education Secretary Sara Duterte mahitungod sa usa ka magtutudlo nga nag-viral human nga gikasab-an ug giprangkahan ang mga estudyante samtang naka-livestream.
Sumala ni DEPED 11 spokesperson, Jenilito Atillo, atol sa ekslusibong pakighinabi sa Bombo Radyo Davao, nasabtan niini ang kahimtang sa mga magtutudlo nga nakasinati og ilabihang emosyon sa pagpamadlong sa ilahang mga magtutuon.
Apan nagpahimangno si Atillo nga dili haom ang pagpabuhi og dili maayong pinulungan ngadto kanila nga laumang maghatag og dagkong epekto sa ilang pagtoon ilabi na sa ilahang pagdako.
Nagpahimangno sab si Atillo ngadto sa mga ginikanan nga magsugod gayud ang pagdisiplina sa ilahang mga anak sa ilahang panimalay. Haom lamang nga pagasugdan sa ginikanan ang pagtudlo og maayong pamatasan sa ilahang mga anak.
Mahitungod sab sa taho nga nadawat sa DEPED 11 pipila ka mga magtutudlo sa public schools ang nangahadlok gumikan sa pagpanghulga sa mismo nilang mga estudyante, nagpahinumdum sab ang opisyal nga dili angayng basolon ang mga tulunghaan ug mga magtutudlo sa pamaagi sa pagdisiplina sa ilahang anak nga usa ka nag-unang obligasyon nga kinahanglang pagabuhaton sa matag ginikanan.
via || Bombo LJF
