DAVAO CITY – Nag-rekomenda ang lokal nga panggamhanan sa Dakbayan sa Davao ngadto sa Department of Education kon DepEd XI og lima ka mga tunghaan alang sa ipahigayong pilot implementation sa limitadong physical classes karong School Year 2021-2022.
Nagpadala na usab ang Davao City LGU ug sulat ngadto sa DepEd XI, ug padayong ginapaabot ang desisyon sa buhatan kung aprubahan kini o dili.
Ang lima ka mga tunghaan nga buot sa Dakbayan sa Davao nga malakip sa pilot testing sa face-to-face classes sulod sa duha ka bulan mao ang: Dalagdag National High School sa Barangay Dalagdag, Calinan District; G. Tajo National High School sa Barangay Lampianao, Calinan District; Saloy National High School sa Barangay Saloy, Calinan District; Mabuhay Elementary School sa Barangay Mabuhay, Marilog District; ug, Gumitan Elementary School sa Barangay Gumitan, Marilog District.
Gisubay usab ang pagkalakip sa naasoy nga mga tunghaan sa COVID-19 risk assessment sa matag barangay.
Nakatakda usab nga magpagula og guidelines ang lokal nga panggamhanan alang sa pagpatuman sa health protocols sa pagpahigayon og limited physical classes.
