DAVAO CITY – Sugdan na sa Davao City division sa Department of Education (DepEd) ang pag-broadcast sa ilang supplemental modules sa mga radio ug television networks dungan sa pag-abli sa klase sa Oktubre 5 nga magsilbing self-learning sa mga estudyante nga naka-enroll sa “asynchronous” set-up gumikan sa coronavirus disease (COVID-19) pandemic ilabi na kadtong nahimutang sa mga hilit nga lugar sa Davao region.
Sumala pa kang Arnold Barbasan, nga nanguna sa TV-based Instruction and Radio-based Instruction (TVBI-RBI) nga maoy nagmugna sa supplemental materials, gikatakda nga e-ere sa ahensiya ang “Matuto sa Radyo” (Learn on Radio), usa ka oras nga radio program nga langkuban sa lima ngadto na sa pito ka mga episode alang sa mga leksiyon sa mga nagkadaiyang learning areas diin target ang kindergarten hangtud Grade 12 students sa rehiyon alang sa opening week sa nagsingabot nga abli sa klase.
Gitataw ni Barbasan nga ang supplemental materials gimugna sa 30 writers ug content producers nga gibansay sa mga educators nga adunay background sa media industry kini aron nga daling mapasabot ngadto sa mga bata nga tinun-an ang ilang mga leksiyon.
