DAVAO CITY – Gi-anunsiyo sa Department of Education (DepEd) Region XI nga walay suspensiyon sa klase luyo sa deklarasyon sa Martial Law sa Mindanao.
Matud pa kang DepEd XI Spokesperson Jenelito Atillo nga nakadawat sila ug daghanang tawag ug text messages kalabot sa posibleng pagsuspende sa klase gumikan sa gipatuman nga balaud militar.
Gipasalig sa ahensiya ang kaluwasan sa mga tinun-an ilabi na panahon sa abli sa klase.
Gikanayon sab ni Atillo nga suportado sumala pa sa ahensiya ang nahisgutan nga lakang ni Pangulong Rodrigo Duterte aron nga mapugngan ang terrorism spillover gikan sa Marawi paingon na sa mga kasikbit nga dapit.
Nanawagan sab ang opisyal sa mga ginikanan nga ipasabot pag-ayo ngadto sa ilang mga anak ang kasamtangan nga sitwasyon.
Sa pikas nga bahin gipatuman sab nila ang mga sumbanan nga gipagula sa kasamtangan nga sitwasyon sa siyudad.
Samtang gibutyag sab ni Davao City Police Office Spokesperson, Police Senior Inspector Ma. Teresita Gaspan, nga magpakatag sila ug mga police officers ingon man police auxiliary alang sa traffic ug security atol mismo sa pag-abli sa klase.
