DAVAO CITY – Hugtanon nga nagpahimangno karon ang ahensiya sa Department of Environment and Natural Resources (DENR) 11 ngadto sa publiko nga dili hilabtan ang mga makita nga migratory birds nga misulod karon sa nasod.
Kahinumduman nga daghanang mga klase sa langgam diin pipila niini mga endangered species ang namatikdan karon sa area sa Davao del Norte, Davao oriental, Davao del Sur ug dinhi sa dakbayan sa Davao.
Sumala pa kang Jayvee Jude Agas, tigpamaba sa Department of Environment of Natural Resources (DENR) nga kinahanglan tan-awon lamang ang mga langgam ug dili kini pandakpon gumikan kay mamahimo sumala pa nga mag-atubang ug silot o pahamtangan ug multa ang mga makasupak niini.
Nasayran sab sa ahensiya nga kadaghanan sa mga migratory birds ang naggikan sumala pa sa nasod Siberia, China, Korea, Japan, Australia ug New Zealand.
Gitataw sab ni Agas nga matag bulan sa Setyembre mosulod ang mga migratory birds sa nasod apan mobalik kini sa bulan sa Pebrero sa ilang mga lugar.
Mobisita matud ang mga langgam dinhi sa nasod gumikan kay buot nila nga likayan ang bag-o sa klima sa ilang lugar.
