DAVAO CITY – Muabot na sa lima ka indibidwal sukad Enero hangtud Hunyo ning kasamtangang tuig ang namatay sa dakbayan sa Davao gumikan sa Dengue.
Gumikan sa sunod-sunod nga mga pag-ulan, subling nanawagan karon ang Tropical Disease Unit sa City Health Office (CHO) ngadto sa mga dabawenyo nga ugalion ang paglimpyo sa palibot.
Matud kang Beth Banzon, head sa Tropical Division sa CHO, ang natalang mga kaso ang gikan sa Barangay 76-A, Barangay Agdao, Matina Aplaya, Sasa , ug Matina Pangi.
Sukad Enero hangtud sa kasamtangan, muabot na sa 951 ka mga kaso ang natala sa ilang ahensya diin mas taas pa kini kung itandi sa milabay nga tuig nga adunay 921 ka mga kaso lamang .
Busa, nagpadayon ang ilang hugot nga pagmonitor sa mga dengue cases.
Gumikan niini, nanawagan ang opisyal ngadto sa publiko nga bungkagon ang breeding site sa mga lamok, limypohan ang palibot ug suportahan ang ipatuman nga fogging sa lokal nga panggamhanan.
Via || Hana Rallos
