DAVAO CITY – Gipangunahan ni Philippine National Police (PNP) chief Ronald “Bato” dela Rosa ang inagurasyon sa Regional Women and Children Protection Desk (RWCPD) shelter and playground project sa Police Regional Office (PRO), Camp Quintin M. Merecido, Buhangin, ning dakbayan sa Davao.
Mapasalamaton si Dela Rosa sa Rotary Club of South Korea, Rotary Club of Downtown Davao ug Philippine Military Academy (PMA) Sinagtala Class of 1986 sa pagtukod ingon man pagpalambo sa maong gmbalay.
Ang nahisgutan nga pasilidad modawat sumala pa ug mga kababaenhan ug mga bata nga mga biktima sa bisan unsa man nga pagpangabuso.
Gitataw sab ni Chief Superintendent Marcelo Morales, PRO deputy regional director for administration, nga ang bag-ong pasilidad makonsidera nga naha-om sa panahon gumikan sa kasaulogan karon sa Women’s Month.
Mipasalig sab ang opisyal nga palig-onon pa ang ilang pagpaningkamut aron batukan ang pagpangabuso sa mga kababaenhan ug mga kabataan dinhi sa rehiyon.
