Gipadayag ni kanhi Anakalusugan Party-list Representative Mike Defensor nga wala pa kini magplano sa pagkakaron og pagsang-at og kaso batok kang National Bureau of Investigation (NBI) Director Melvin Matibag, bisan pa sa kasong qualified human trafficking nga gisang-at batok kaniya ug sa iyang pamilya.
Sumala pa kang Defensor, hulaton una niya ang hustong panahon sa dili pa mohimo og legal nga lakang batok kang Matibag. Matud pa niya, dili pa angay nga magsang-at siya og kaso sa pagkakaron. Dugang pa niini, iyang gipahayag nga bisan sila ang unang misang-at og reklamo uban sa 18 ka bodyguard ni kanhi kongresista Zaldy Co, sila hinuon, matud pa niya, ang giimbestigahan sa mga awtoridad.
Kahinumduman, niadtong Hunyo 26, misang-at ang NBI og kasong qualified human trafficking, nga usa ka kasong dili mapiyansahan, batok nila Defensor, sa iyang asawa nga si Julie Rose Defensor, ug sa ilang mga anak nga sila Michaela ug Miguel Gabriel Defensor. Sa kasamtangan, giingon ni Defensor nga nasabtan niyang posible nga adunay politikal nga motibo ang reklamong gisang-at batok kaniya, apan gikuwestiyon niya ang giingong pagdumala ni Matibag sa institusyon sa NBI.
Giklaro usab niya nga si Matibag lamang ang iyang gipasabot ug dili ang ubang kawani sa ahensya. Lakip sa iyang gipadayag, daghan na usab, matud pa niya, ang nagtawag ug nagpadala og mensahe kaniya nga nagpahayag sa ilang kasuko batok kang Matibag.
Sa pagkakaron, wala pa’y opisyal nga pahayag si NBI Director Melvin Matibag kabahin sa mga pasangil ug pahayag ni Defensor.
