Gipahayag ni defense counsel Atty. Mark Vinluan sa Senate impeachment court nga giangkon mismo sa prosecution nga wala kini direktang ebidensiya nga nagpakita nga si Vice President Sara Duterte nanuhol o mikuha og assassin.Sumala pa ni Vinluan, bisan giila sa prosecution nga ang mga pahayag ni Duterte kaniadtong Nobyembre 23, 2024 “may not actually 100% prove” nga adunay kontrata sa pagkuha og assassin, wala gihapon kini makapakita og pamatuod sa maong alegasyon.
Misupak usab kini sa paggamit og pulong nga “assassin,” tungod kay wala kini gamita mismo Bise Presidente sa iyang press conference, ug giingon niya nga ang interpretasyon niini gikan lamang sa mga tawo nga mikuha sa pahayag gawas sa hustong konteksto.Gibase sa depensa ang ilang argumento sa giingong “Operation Romanov,” usa ka alegadong plano batok kang Duterte ug sa iyang pamilya, nga giingong nahisgutan na sa mga rekord sa interbyu sa National Bureau of Investigation (NBI) sa wala pa ang maong press conference.
Miingon usab si Vinluan nga ang mga pahayag ni VP Sara Duterte angay sabton isip reaksyon sa usa ka asawa, inahan, anak, ug igsuon tungod sa kabalaka sa seguridad sa iyang pamilya, dili isip opisyal nga hulga.Gipasabot sa abogado nga ang alegasyon sa grave threats ug inciting to sedition dili maihap isip “high crimes” nga mahimong basehan sa impeachment ubos sa Konstitusyon. Gitapos ni Atty. Vinluan ang iyang argumento pinaagi sa pag-ingon nga wala nakahimo og betrayal of public trust ang Bise Presidente ug ang iyang mga pahayag nagrepresentar lamang sa kabalaka sa katawhan batok sa giingong korapsyon sa gobyerno.
