DAVAO CITY – Gibutyag sa usa ka opisyal sa Bureau of Jail Management and Penology (BJMP)-Davao Region nga nagpadayon ang decongestion sa Davao City Jail sa Maa kini tungod nagpabilin ang bahad sa Covid-19.
Sumala pa kang BJMP-Davao Spokesperson Edu Lobenia nga sa kasamtangan, ang city jail adunay 1,700 inmates o pag-ubos ug halos katunga gikan sa 3,000 sukad nga nadestino siya sa city jail.
Gikanayon sa opisyal nga ang pag-ubos sa jail population tungod sa plea bargaining agreement on drug-related cases ingon man ang pagpatuman sa Good Conduct Time Allowance (GCTA).
Nasayran sab kang Lobenia nga sa kasamtangan, gi-asikado na sa BJMP ang gikatakdang pagtukod sa state-of-the-art jail facility sa Barangay Wangan, Calinan ning siyudad nga pondohan ug P369 million diin mamahimo sumala pa kini nga makaakomodar ug 5,000 PDLs sa higayon nga makompleto kini.
Mas maayo na matud pa ang maong rehabilitation sa PDLs ug masolusyonan na ang overpopulated jail facility sa Maa. Gani target sumala pa nila nga mobalhin sa Wangan sa mosunod nga tuig.
