Miabot na sa 53 ang ihap sa mga namatay sa pagkalunod sa MV Trisha Kerstin 3, human marekober ang usa ka bahin sa lawas sa biktima atol sa dive operations sa kadagatan sa Baluk-Baluk Island sa Basilan karong adlawa.
Sumala ni Philippine Coast Guard o PCG Spokesperson nga si Capt. Noemie Cayabyab, narekober sa technical diving group sa PCG ang maong parte sa lawas ug gitug-an kini isip dugang nga namatay sa insidente.
Giusab sa PCG ang inisyal nga ihap sa mga survivor gikan sa 316 ngadto sa 293.
Gipasabot ni Capt. Cayabyab nga ang pagbag-o sa datos gibase sa makuti nga beripikasyon sa pagkatawo sa mga pasahero, lakip ang mga survivor nga nakalista sa manifest, ang mga indibidwal nga naluwas apan sa ulahi nakumpirmang wala diay sa listahan, ug apil na ang mga declared ug undeclared crew members.
Base sa datos niadtong Pebrero 12, adunay 26 pa ka mga indibidwal nga nagpabiling nawagtang.
Dugang pa ni Capt. Cayabyab, kadaghanan sa mga namatay nga pasahero nakalista sa manifest sa maong RoRo vessel. Apan, aduna pay unom ka narekober nga mga lawas nga wala pa mailhi hangtod karon, ug nagpabiling lakip sa listahan sa mga missing persons.
